Muata, bitte, hea ma zua,
i, dei Willi, i, dei Bua,
sog da heit, i hob di gern!
Wiast mi wohl im Himmü hearn?

Host no ollweu füa mi z’tuan,
ohne di war i valurn!
Oft muaßt du in Herrgott bittn,
wonn i wüld vom Teifl g’rittn!

Wonn in dera lautn Wöt
mia dei Schürznzipfl föht,
der de Tränen wegg’wischt hot,
wonn i gwoant hob in da Not!

Und i woaß’s no, wias einst woar,
wiast ma g’fohrn bist üwa d’Hoar,
Wia i mi valegn hob buckt,
wonnst ma d’Spangerl aufi druckt!

Wia i hamlich protestiert,
und mi in da Schul geniert,
weust ma söwa d’Hosn g’naht,
und füa d’Schuach de Bandl draht.

Wiast oft gwoant host in da G’hoam,
weu da Vota nit dahoam,
und bis heit an nimma kumma,
weu da Kriag eam vo uns g’numma!

Muata, denk nit on de Zeit!
S’geht da sicha bessa heit!
Loß in Herrgott freundli griaßn,
i geh iazt om Friedhof giaßn.

So, iazt loß i dir dei Ruah,
i, dei Willi, i, dei Bua!